حابب اتكلم عن حاجه كتير مننا فاهما وفاهم يتعامل معاها ازاي وكتير برده خايف منها وشايف ان هو كمصمم واو حابب يبقا مصمم فهو كده معتش ليه مكان في وسط التطور في أليات الذكاء الصناعي وانا حابب اقولك ان الموضوع مش كده خالص
تعالي بس نبدا من الاول هو ازاي المصممين والفنانين بيطلعو افكارهم قبل الذكاء الاصطناعي وقبل كل ده هتتلاقي كله بيتشارك في حاجه واحده وهي الالهام او الفكر او الinspiration مفيش حد بيفتح البرنامج اللي هيصمم عليه سواء 2d او 3d الا مايكون في فكره هو حابب يطبقها او استلهم منها حاجه او عاوز يعمل فكره جديده خالص بناء علي مواد موجوده وبيجي هنا بقا عوامل البحث في جوجل مثلا او Pinterest عن حاجه شبه الفكره اللي في دماغه عشان هو عارف ان ده بيفتح افكار جديده علي فكرته وبالتالي بيطلع فكره جديده وده بيسمي التطور فكره علي فكره وده اللي حاصل تقريبا في معظم مجالات الحياه مش في التصميم والفن بس الفكره وبعد كده بتطور مثال بسيط جدا علي ده بص علي العربيات الي ماشيه في الشارع شوف كام شركه علي مستوي العالم بيشتركو في الشكل المنطقي للعربيه بعد كده تلاقي كل شركه مغيره حجات وده منطقي طبعا عشان الاختلاف والتطور
الذكاء الاصطناعي من وجه نظري هو مكمل مش منفصل عن المنظومه دي اللي مخوف الناس منه طريقه تناول الكلمه وطريقه الناس اللي بتبحث عن مشاهدات وتحقيق ربح من اثاره الجدل وخلاص هتفتح اليوتيوت وهتلاقي فيديوهات من نوعيه (الذكاء الاصطناعي كيف دمر المصممين😂) الذكاء الاصطناعي هيعقدك في البيت وهكذا ... طبعا نوعيه الفيديوهات والبوستات دي مش هتخلص هتلاقيها علطول موجوده حواليك
نيجي بقا للذكاء الاصطناعي ونقول هو بالنسبالنا ايه بجد وهنا بقا بنتكلم علي الناس اللي فاهمه شويه الموضوع بقصد هنا المصممين اللي صمم اكتر من تصميم بطريقه البحث العاديه وهنا الموضوع هيختلف من شخص لشخص في ناس هتعتبر ده اداه جديده معاك يعني مثلا لوانت مصمم تصميمات داخليه في شغل المعمار وكده انا شخصيا كنت بدخل علي موقع archdaily و houz واشوف الافكار اللي موجوده في المواقع دي ايه واصمم تصميمي طبعا باختلاف وبتطور عن الموجود بالنسبالي الذكاء الاصطناعي بقا archdaily و houz وai بس كده وده علي حسب الحاجه اداه بحث اقدر احدد فكره معينه انا عاوز اعملها متخصصه شويه ده بيزودلي افكار كتير في التصميم
في ناس تبدأ تقولك طب انت تصممها ليه ماهو الذكاء الاصطناعي طلعلك فكره حلوه اهي وهنا انا بتفق معاك في موضوع فكره ده بس مش تصميم انت متخيل عميل يطلب منك عمل مثلا وتقولوه تمام خلصت ويقولك هشتريها بقا منك تقوم باعتله صوره طالعه بالai تخيل انت بس وقولي
في ناس برده تقولك ماهو العميل ده مش هيجيلي اصلا عشان اصممله حاجه ماهو هيجيب فكره معينه من الذكاء الاصطناعي ويقوله انا عاوز ايه بالكلام ويطلعلو الصوره وقشطه علي كده هرد عليك بحاجتين
لو العميل اصلا فاهم هو عاوز ايه بالظبط وكتب اللي هو عاوزه وطلعله النتيجه اللي هو عاوزها وهو فاهمها فده هو اصلا استخدم اداه تصميم كانه استخدم الفوتوشوب بالظبط بس هو فاهم في كده بس وده انا احييه وبنعتبره اصلا مصمم مش عميل
الخلاصه مفيش حد مابيشتغلش بالذكاء الاصطناعي اصلا مش من السنه دي بس ده من اول انشاء برنامج الرسام التابع لميكروسوفت
مجرد انك تفتح اصلا جهاز الكمبيوتر وتشتغل بيه فانت بستخدم الذكاء الاصطناعي زي مانا بعمل كده بالظبط
الوحيد اللي مقلل في استخدام الذكاء الاصطناعي هو الي ماسك ورقه وبيرسم عليها وهنا تخيل الفرق بين واحد بيرسم ببرنامج الرسام قصاد اللي ماسك ريشته وخلينا متفقين في الاول ان الاتنين فنانين او تعالي نخليهم نفس الشخص هتلاقي في بليته الوان مع قبل مايستخدم البرنامج نتخيل مثلا انهم 100 مثلا في حين ان معاه في البرنامج بليته الوان ممكن تصل الي 1000000 لون
ده بالنسبالي ابسط حاجه عشان تعرف الذكاء الاصطناعي بيعمل ايه فأرجوك ماتخفش من نوعيه الاسئله المحبطه بتاعه الذكاء الاصطناعي هيقعدكو في بيوتكو وبلا بلا او حتي لو انت عاوز تتعلم اتعلم واعرف ان حظك حلو احسن من اللي بيستخدم برنامج الرسام لو انت بتشتغل بالفوتوشوب مثلا او برامج اوتو كاد او بليندر وحظك حلو اكتر لما يدخلو الذكاء الاصطناعي كاداه مساعده ليك في الافكار مش حاجه تقعدك في البيت وبلا بلا اصلا اللي بيحاول يطور الاداه ده هي برامج التصميم اصلا زي شركه ادوبي مثلا فاكيد يعني هي مش هتديك الاداه دي عشان هي عاوزه تقفل مثلا وده اخر العلم .
طبعا الموضوع مفتوح للمناقشه في التعليقات لو حد حابب يتكلم في النقط دي وارجو اني اكون وصلت وجه نظر وخففت خوف او ماشاباه ذلك من الاداه دي دمتم بخير